بوستر الأغنية

طرح الفنان مراد مكرم أحدث أعماله الغنائية بعنوان «سكر نبات» عبر موقع الفيديوهات «يوتيوب» وعدد من المنصات الموسيقية الرقمية، فى تجربة احترافية فى مجال الغناء، مؤكدًا أن الأغنية تمثل البداية لمشروع غنائى جديد يسعى إلى تقديمه خلال الفترة المقبلة.

وتحدث مراد مكرم عن خوضه تجربة الغناء، قائلًا فى تصريحاته: «بمجرد ما أخدت قرار إنى أخوض تجربة الغناء، اتعرضت عليَّ أكتر من أغنية، لكن سكر نبات، شدتنى من أول مرة بسبب كلماتها الخفيفة والجميلة، وحسيت إنها أغنية تدخل القلب بسهولة، واخترت إنها تكون البداية المناسبة قبل ما أقدم باقى الألوان الغنائية اللى نفسى أغنيها، علشان كده اخترتها تكون أول خطوة فى المشروع الجديد اللى بشتغل عليه».

وأضاف: «سكر نبات قريبة جدًا من شخصيتى الحقيقية، فيها روح مرحة وخفيفة، ويمكن الناس متعودة تشوفنى بشكل مختلف كممثل أو إعلامى، لكن دى شخصيتى فى الحقيقة، وحبيت الجمهور يتعرف عليها من خلال الأغنية».

وعن اختيار الأغنية، قال: «لا، الأغنية كانت بإجماع كل فريق العمل، من أول ما سمعناها خطفت قلوبنا كلنا، وكلنا اتفقنا إنها تستحق تكون البداية».

وردًا على اللقب الأقرب إليه بين الممثل والمطرب والإعلامى، قال مراد مكرم: «أكيد هحافظ على التوازن بين التمثيل والغناء والتقديم، لأن الثلاثة بالنسبة لى مجالات بحبها جدًا، ومش شايف إن واحد فيهم لازم يكون على حساب التاني».

وقال: «أنا اعتبرها مجرد بداية، وعندى أفكار ومشروعات غنائية كتير خلال الفترة الجاية، لكن مستنى الأول أشوف رد فعل الجمهور على سكر نبات».

وعن رؤيته للمشهد الغنائى فى مصر، قال: «الساحة الغنائية حاليًا مليانة مطربين ومغنين مميزين، وفيها تنوع كبير سواء فى الكلمات أو الألحان، وده شيء صحى جدًا، سواء مع النجوم الكبار أو الأصوات الجديدة اللى لسه بتبدأ طريقها».

وأضاف: «السوشيال ميديا أصبحت عنصر مهم فى قياس نجاح أى أغنية أو تجربة جديدة، لكنها ليست المعيار الوحيد، لأن النجاح الحقيقى بيستمر مع الوقت».

تقول كلمات الأغنية:

طعمة وأطعم من الأناناس والخدود طارحين رمان

نور عنيكى بريق ألماس والجمال ده جمال غزلان

ياللى متشافة قمرا فى تكوينك واللى فرقك كمان سحر فى عيني

كده فى العيون عامل قلبان

كنافة عسل وسكر وزبيب ومكسرات

لون قلبك فتة بيضا والروح سكر نبات

دا إنتى متشكلة فى نور نجماية

وإنتى فى الحسن قمراية

وآيه يا بحور هوى منسمة أفراح